澳洲 - 電話卡

黎到澳洲，點都要打個電話返屋企報平安。而電話卡都有分好多種。Sim Pack 有分兩種，一種係 AUD$30 既 Starter Pack，包張 Sim Card 同 AUD$30 既 Credit Plan。唔同公司既 $30 Plan 有唔同既通話分鐘同埋 Data。一般 AUD$30 既 Sim Pack 都已經係無限通話，只係 Data 少 D。

但如果你驚 $30 Credit 唔夠用，可以買一張 AUD$2 既 Sim Card 然後買 Prepaid Voucher 增值。係超市，電話舖同埋便利店既 Counter 都可以買到 Recharge Voucher。Prepaid Plan 大部分都係每 28日結算，即係話每 28日就要 Recharge （充值）一次。當然，如果你係之前就爆分鐘，就要提前 Recharge。如果係我，我會俾多 D 錢買個 Unlimited 既 Plan。

另外要知既就係打電話點樣收費。是咁的，每打一次電話就要俾接駁費（即使打出電話無人聽都要俾的），然後每分鐘計。間間公司都唔同，所以要睇清楚個 Rate。

如果你係用 4G 電話，恭喜你，因為最好既係 Telstra，Vodafone，Virgin 同埋 Optus。

呢4 間公司入面，最貴既係 Telstra，因為佢既覆蓋範圍最大，即使係偏遠地區摘生果都無問題。而 Vodafone 最近新出左 AUD$40 既 Prepaid Plan，無限 SMS，MMS，同埋國內電話通話。仲有包 90 分鐘長途電話同埋 3Gb Data，超級抵。

Optus 都有 $40 既 Plan 但唔包長途電話，意思係要加錢先可以打到長途電話。但 Optus 有個好適合黎短期旅行既 Plan，就算 $2 Day Sim。意思係一日內無限 Data，通話，SMS 仲有 MMS，只需要 $2！但每次最少 Recharge $10。

至於 Virgin，佢係以通話費費黎計算。

即係話假設你買個最平既 AUD$19 既 Prepaid Plan，你有價值 $100 既通話時間。$100 好似好多？話說 Virgin Prepaid 既接駁費係 4 毫子，然後每分鐘 9毫子。計返條數，100 分鐘都無，所以係要揀個貴 D 既 Plan。

仲有好多立立雜雜既電話公司但好多時都 D 大公司分拆出黎既。如果唔揀以上提及既公司，記得要問清楚係咪 4G Network，因為以我所知，某公司好平既 Sim Pack 係 2G Network！

準備出發去澳洲，有咩要知？

由香港坐直航機飛澳洲既話大約係 9 個鐘，比較多人搭既係 Qantas，CX (國泰) 同埋 Virgin。

	寄艙行李	手提行李
Qantas 經濟艙 (Economy)	30 Kg	7 Kg
Qantas 商務艙 (Business)	40 Kg	7 Kg
CX 經濟艙 (Economy)	1 件 20 Kg	7 Kg
CX 商務艙 (Business)	30 Kg	7 Kg
Virgin 經濟艙 (Economy)	1 件 23 Kg	6 Kg
Virgin 商務艙 (Business)	3 件每件少於 32 Kg	6 Kg

如果想平 D 可以選擇 Singapore Airline (星航)，由香港出發，係新加坡轉機到澳洲，服務好，而且包 30 Kg 寄艙行李。又或者可以揀廉價航空 例如 Jetstar 或 Airasia，但有時額外費用加加埋埋同買好既 Airline 差唔多價錢。

本人鍾意直接去Airline 既 Website 度訂機票，又或者去zuji hk， 可以比較價錢。http://www.zuji.com.hk/

另外，澳洲有冬令同夏令時間 (Daylight Saving)。好似悉尼咁，係夏天就快香港 3 個鐘，而係冬天就快 2 個鐘。

黎澳洲之前最好買保險，因為唔怕一萬，只怕萬一，唔小心起呢度出事要 Call 白車，係好貴架！ 每個 State 嘅收費都唔一樣，以 Sydney (NSW) 為例，緊急 Call $683 + $6.17/km ; 非緊急CALL $275+ $1.7/km。講緊既係 AUD$$$呀！仲有之前睇新聞話有香港人黎澳洲 Working Holiday 無買保險然後發生意外，搞到無錢返香港，上晒頭條，所以保險真係好緊要。

講開又講,，Emergency Number 係 '000'。無論係 Call 白車，報警，Call 消防車等等，都係打呢個電話。

    

有咩建議係澳洲買

日用品方面，Sydney，Melbourne，Gold Coast 同 Brisbane 都有 Daiso，好似日本城既 AUD$2.8 店，乜都有，真係唔使帶好多野。

床舖用品例如枕頭被舖佔隻喼好大空間，而且又唔知咩Size 既床 (呢度好興King Single Bed，係會比一般既 Single 大)， 雖然新野可能無用開既咁好，但個人認為帶多 d 衫實際 d。

防曬護膚

澳洲既太陽真係好毒架，出街既話記得搽太陽油，戴太陽眼鏡，帽同埋外套。

係澳洲比較多人用既防曬係 Cancer Council 既產品，由 SPF30+ 到SPF50+ 既都有。除此之外，仲有好多唔同產品，而且包括有分小朋友同大人既防曬。如果係日日用，可以買最基本既 SPF30+，如果要落水玩既就要買有防水功能既防曬。

另外，澳洲好一年四季都好乾燥，一定要有潤膚霜。講到潤膚霜，係澳洲買過又用過最好，最潤既我覺得係 Bio Oil。Bio Oil唔單止潤，仲有去疤，去橙皮紋既功效。最重要一點，佢好好聞！ 如果想自己帶，最好帶比平時用開更潤，更補濕既 Cream。

出發去澳洲，有咩要帶？

Sydney，Melbourne，Brisbane，Perth，Adelaide 同 Cairns City 都有華人超市，日/韓國超市，所以周圍都買到公仔面或者杯面，打算去偏遠地方既你可以起City 入定貨先。但係，一包出前一丁要 8-9 毫子，一個杯面要 個幾銀錢，超唔化算！之但係咁，有朋友試過帶公仔麵，結果調味料被抽走，淨返個麵餅，真陰公豬。如果想煲湯補身，呢度華人超市都有湯包賣，大概三個幾一包。

但又要記住，奶類制品，新鮮蔬果肉類係唔入得口，唔好以為入境時唔出聲就無得，係入境大堂會有人會 Check 你隻喼，被發現持有違禁品會罰錢同埋沒收違禁品。我嚟咗咁多年，返親嚟都俾人開喼，所以記住申報。

外套係必須要有。唔好以為澳洲夏天就會熱到唔使著外套。原因有3 個：

1. 太陽太毒，曬得耐真係會紅晒

2. 即使係夏天好熱，只要企係有遮檔既地方例如樹蔭，都會因為大風而覺得好涼

3. 早晚溫差好大，有時差成十幾度

水樽

澳洲大部份地方嘅水喉水都可以唔使煲就咁飲，自己帶個水樽就方便好多啦。同埋乾燥嘅天氣，飲多 D 水對皮膚都好 D。

波鞋都好重要，因為係澳洲閒閒地一行就半個鐘而且 D 路有時唔平，著波鞋就會舒服 D。

有一樣我黎既時候都無帶，就係風筒。好似好小事，但原來真係日日都要用，最後唯有係澳洲買。

時下既年輕人都係手機，電腦不離身，叉電器當然唔少得。雖然澳洲同香港電壓一樣都係240V，但係，澳洲既插頭係8字腳。本人建議買個拖版，咁就可以一次過叉幾樣野,，因為住Backpacker 又好, Shareroom 都好，好多時都要爭插蘇。 你可以去深水涉鴨寮街搵下或者上網買。

澳洲 - 旅遊簽證

旅遊簽證

如果你只係想旅行，持有BNO 或 HKSAR Passport 嘅你可以申請 Electronic Travel Authority (Subclass 601)，費用為 AUD$20，一般即日批既。呢個 Visa 容許你一年內無限次出入境澳洲，每次最多只可以留 3 個月。

要注意既係，如果你個 Passport 比個 Visa 先 Expired，你要重新申請 Tourist Visa。

緊記，拎住呢個簽證千其唔好係澳洲工作，犯法架，俾人捉到會趕你出境。

依加去澳洲，都係電子簽證。即係話，你唔需要去 Immigration 度拎Visa Label。你只需要Print 個visa. 假若你想要返張Visa Lable 貼起本Passport度留念， 你可以去填張 Form 1405 申請， 費用為AUD$150正。

網上申請Link:

http://www.border.gov.au/Trav/Visa-1/601-

澳洲 - Working Holiday Visa 2

之前提到 Working Holiday Visa (Subclass 417) 俾你係澳洲留一年，但如果仲未玩夠，你可以再一次申請 Working Holiday Visa，但前題係你係第一次 Working Holiday 時係偏遠地區嘅指定行業做滿3個月或88日嘅工作。指定行業泛指農場，果園。

注意: 黑工(cash in hand) 係唔計既，因為申請 Visa 時要提供有關證明文件包括糧單及薪資證明或薪資總表(Group Certificate)。 每年7月份要報稅時，公司會寄俾你，因為可以用嚟退稅。

如果唔見左呢兩份文件咁點算呢? 你可以請求顧主幫你簽分文件，證明你係個度工作過。但最好就唔好唔見啦！

另外，申請第二次 Working Holiday Visa 時可以起境內或境外提出申請。

• 如果你打算起境內提出申請,，申請時同批個陣,，都要留起澳洲境內

• 如果你打算起澳洲境外提出申請，申請時同批個陣,，都要留起澳洲境外
• 申請時一定唔可以過左30歲，但個 Visa 批左之後生日就無問題

行業及有關偏遠地區區號詳情，請參閱http://www.border.gov.au/forms/Documents/1263.pdf .

澳洲- Working Holiday Visa 1 (工作假期簽證）

想去澳洲可以申請咩 Visa？

香港人可以申請既 Visa 包括 Working Holiday (工作假期簽證)，Tourist Visa (旅遊簽證)，Student Visa (學生簽證) 等等。其中比較熱門既係 Working Holiday (Subclass 417)。

顧明思意，Working Holiday Visa 俾你係澳洲做野同旅行，只要你係：

• 18-30 歲既年青人(啱啱過18而未到31) 可以申請
• 無犯罪記綠人士
• 持有BNO或特區護照，申請時本PASSPORT最好有六個月以上嘅有效期
• 未申請過 Working Holiday Visa

點申請？

Visa 係可以上網，郵寄或者親身去領事館申請，但上網比親身或郵寄快而且好簡單。費用係 AUD$440（以當日 Exchange Rate 兌返港紙)，然後等到通知你去指定既診所做Health Check。最好預多D時間去申請。

簽證到手後，你可以：

• 係十二個月內隨時前往澳洲
• 其間無限次出入境
• 逗留澳洲十二個月
• 但唔可以同同一雇主工作超過六個月
• 讀唔超過４個月既課程 e.g.讀語言

參考 http://www.border.gov.au/Trav/Visa-1/417-

澳洲 － 悉尼篇之 Light Rail

悉尼有巴士,火車同渡輪船，咁又點少得好似香港叮叮車嘅 Light Rail (輕軌列車) 呢？不過相比起其他四通八達嘅公共交通工具，Light Rail 能夠去到嘅地方就比較有限。雖然政府有意係未來幾年大力發展市內輕軌路線，但係佢暫時都只有單一條路線往返Central火車站同Dulwich Hill。 Light Rail 沿途會停喺幾個熱門地點例如 Chinatown，Darling Harbour，The Star Casino (賭場酒店)，同埋 Fish Market (漁市場) 等等。

乘搭Light Rail注意事項：

1. 服務時間及班次

Light Rail 班次為10～15min。除左 星期5/ 6 會延長服務時 0600~2400，普遍係 0600～2300 行駛。

(夜遊朋友們：The Star Casino 係24hours 歡迎大家，所以係 2300~0600，每 30Min 都有 Light Rail 往返 Central 㗎!)

2. 買 Ticket (有3個 Options)

1. 先上車後補票？無問題!XD 加因車上有票務員巡視，每停完一站，見到生面口嘅乘客，佢都會問一問你邊度落車，可以即時買飛但係只收現金，有找贖嘅。
2. Opal Card Holders 只需在月台 Opal拍卡柱 上落車都記得 Tap On 同 Tap Off 就得啦。 車上票務員都會用讀卡機檢查你有無乖乖拍卡。
3. 火車站售票處 + 售票機都可以用 Cash / Credit Card 買飛。

3. 車費：

Light Rail Fare 係以 Zone 計算嘅，係同一個zone上落平過跨 Zones

Photo resource: Transport for Sydney website

Zone 1 : Central - Convention (Darling Harbour)

Zone 2 : Pyrmont Bay (Darling Harbour) - Dulwich Hill

Fare	Single	Return
1 Zone	$3.80	$5.20
2 Zones	$4.80	$6.40

Children 3 years old or under travel FREE.

Resource: Transport for Sydney website

根據以上車費表，如果大家想先上車後補票， 又決定咗來回都係搭 Light Rail，最好就一次過買抵啲嘅 Return Ticket 啦!

車上沿途都有好清楚嘅站名廣播同埋可以問友善嘅票務員去到邊，再加上 Light Rail 係站站停，無須㩒鐘，所以大家大可以 Sit Back and Relax 睇睇風景，影影 Selfies ♡

澳洲 - 悉尼篇之 巴士

555 Free Shuttle Bus

如果只係係 City逛，可以搭免費既巴士555，架車會沿住 George Street（City 主要大街）行一個圈。話就話每 10分鐘有一班車，但好多時都唔準時，就算有車都因為免費而逼爆車，但唔洗錢既野就唔好投訴啦。

Sydney Bus

另外，因為好多地區搭火車係去唔到，有時會需要搭巴士。

咁搭巴士有咩要注意呢？

首先，雖然悉尼有好多間巴士公司，但全部都可以用Opal Card，只需要係上落車時拍卡就得。但如果無 Opal Card，可以係便利店或者上車買飛。上車買飛既話，只需要同司機講你要係邊度落車，佢就會話你知要俾機多錢，無散子既話唔緊要，有得找既。

如果係便利店買飛（Mybus)，有分一次性同 可以用10 次 ( Travel Ten) 既飛。10 次既會平d，而且可以同其他人 Share 用張飛。例如，3 個人一齊搭巴士，可以買一張 Travel Ten，係上車既時候係打卡機度 入3 次就可以。但搭巴士最麻煩就係要查巴士路程距離（Section)，因為唔同距離，有唔同收費。

MyBus1 – 1-2 Sections
MyBus2 – 3-5 Sections
MyBus3 – 6+  Sections

我用 Opal Travel Search 左個例子。

由Central Station 去悉尼大學既交通公具只有巴士，車費係 $2.10 即係用 Mybus 1就可以。係最底有個 Note，寫住0700-1900 Prepaid Service only，意思係係個個時段，司機係唔會賣飛俾你，一定要有 Mybus 或者 Opal Card 先可以搭車。所以唔好貪方便上車先買飛。

Nightbus

由於火車唔開通宵，巴士公司有提供 Nightbus (通宵巴士）服務，車費都係以唔同既 Section 區分，但只收現金。

詳細車費可以參考以下網址

http://www.transportnsw.info/sites/en/tickets/ticket-types/bus.page#nightride

澳洲 - 悉尼篇之 Ferry

由於悉尼好大，去某 d 地方，搭船 (Ferry) 會快過搭火車同巴士，而且有 d 景點要搭船先去到。

咁係邊度買飛呢？

基本上，有 Opal Card 就可以解決問題，但係如果無的話，係 Circular Quay 同埋 Manly 有售票處同埋售票機。係 Darling Habour 上船既話，都可以係售票機買飛。如果係呢 3 個站以外上船，上船之後會有 Staff 賣飛。當然，係碼頭附近既便利店都可以買到 Myferry 既 Prepaid Ticket。

如果係同一日搭車又搭船，可以考慮買張 Mymulti Daypass (AUD $24)，咁就可以係同一日無限次搭所有交通公具。Mymulti Daypass 可以係火車站同埋碼頭既售票處同埋售票機度買到，好方便。

澳洲 - 悉尼篇之 火車

按時段收費

Sydney 所有既火車線，係Monday - Friday ，都有 Peak Hours 同 Off Peak Hours。Peak Hours 既意思係7-9am 同 4-6:30pm 呢兩個繁忙時間。如果係呢個時段搭火車既話，車費會比Off Peak Hours 貴。如果無Opal Card，可以係車站買飛（Mytrain)。

Mytrain 都分好多種：

單程 (Single)，來回(Return)， 7 日(Weekly)，1 個月(Monthly)，同埋一年既火車飛

Weekly 同Monthly 可以無限次來回同一個地方，例如Strathfield 去Central，而且其間經過既站都可以落車。注意買Mytrain 可以揀 City，即係可以係 City Circle 任可一個站落車，但會比指定一個站既 Mytrain 貴。

火車運作

另外，火車都有分All Stops 同 Limited Stops 既班次火車。如果係All Stops，架火車會沿住條火車線逐個站停，但Limited Stops 只會係條火車線既其中幾個站停。

所以上車之前，一定要睇清楚月台既電視顯示下一班車會唔會 係你要去既目的地停車，如果唔係就要搭返對頭車返轉頭架喇！

Trackwork (維修)

仲有，Sydney 既火車好多時係星期六/日 Trackwork。如果咁岩你要搭既火車線Trackwork，火車公司會有巴士 Replace 火車，巴士會經過火車線既站，但都要注意，有時都會係 Limited Stops，所以上車前都係要睇清楚指示。

火車班次

Sydney 既火車唔似得香港既地鐵咁密，一般9am 前5-10分鐘一班車，過左9am，視乎地區，平均15分鐘一班車，所以我會上131500.com.au 或者用Opal Travel APP 睇下幾點有車先出門口。 如果無Internet, 可以係火車站既售票處問staff 拎本 timetable。

注意：睇timetable 時要小心，因為閒日同星期六日既火車班次係唔同。睇清楚右上角寫既係咩。仲有，右上角會指明係向邊個方向行，唔好搭錯車！

我地用機場去Central station 做例子。

可以下圖睇到，最右手邊7m 係指架火車仲有幾耐到機場，而中間T2 係指邊一條火車線。

機場距離City 好近，搭火車13分鐘就到central station。 但由機場搭火車去city要 $15澳幣！其實有好多酒店提供機場接送服務，唔洗自己拖住隻喼行去酒店，又方便。

如果出現 T2 T4，既係話要轉車，但其實係無必要咁做。

澳洲－ 悉尼篇之 Opal Card

黎左澳洲咁多年，每次有親戚朋友黎到，都問我一大堆有關澳洲既問題，所以我決定開 Blog 介紹一下澳洲。

先介紹一下最似香港既 Sydney。

首先睇下火車線圖，大部分火車線都經過支筆指住既圈，我地叫做 City Circle（CBD)  即係市中心。city circle 係指呢幾個火車站，因為呢幾個火車站包括有商業區，唐人街，Opera House， Sydney Harbour Bridge，仲有蒲既地方等等，可以話係每日最多人去既地方。CBD 基本上可以統稱 Sydney, 所以當約左人而人地問你係邊，千其唔好話你係Sydney, 因為咁同你話自己係九龍無分別。

係2014 年尾， 新南威爾斯省 (New South Wales or NSW) 終於實施使用 Opal Card, 類似香港既八達通（ 八達通其實係澳洲人發明）, 但只限係NSW 用，可以用黎搭火車，巴士，輕鐵(Light Rail）同埋船，但就唔可以用黎買野。

Opal Card 都分好多種，但黎旅行既都係用 Adult。我地可以上網 Order 或者係便利店同埋超市買到 Opal Card。上網訂既話需要幾日既時間，所以最方便係去到便利店同個staff 講話要一張 Opal Card 然後係個度增值就得。Opal Card 本身係唔洗錢既，但每次最少增值 AUD$10。

要提一下，係火車站係無得增值，你要去貼有Opal Card Poster 既舖頭先可以增值 (真係好蠢)。

用Opal Card 既好處係你一個星期內搭夠8次交通工具，個個星期內你再搭任何交通工具都係免費。

如果只係黎幾日又唔會周圍去，可以係火車站直接買車飛，因為退 Opal Card 係一件好麻煩既事，而且用唔晒既 Credit 係無得退的。

要提既係，假設你出閘時無拍卡，個 system 會自動扣你最貴既車費，9am前係 AUD$8.3, 9am 後係 $5.81.

Opal Card Poster

Opal Card